Нарэшце дарабіўся праект, які меў рабочую назву "Псалмы і балады", а пасьля, перабраўшы яшчэ некалькі назваў, мы вырашылі спыніцца на тым, што прапанаваў Яўген Андросік — "Вяровіца Алеся Камоцкага", пазьбегнуўшы тым самым прэтэнзій на аб'ектыўнае раскрыцьцё тэмы. Праграма, складзеная з вершаў Рыгора Барадуліна, была запісаная пры непасрэдным удзеле аранжыроўшчыка і піяніста Аляксандра Віслаўскага. А ў кніжку, дададзеную да CD, гарманічна ўпляліся фотаздымкі Джона Кунстадтэра, прысьвечаныя рэлігійным сьвятам беларусаў.
